「不患人之不己知」的境界

1048576_593786063995353_21823856_o

不以物喜,不以己悲
~范仲淹《岳陽樓記》

不患人之不己知
~論語

我一向承認我係一個脾氣唔太好既人。今日既心情被一個「月光族」既文破壞晒。後生仔係唔使人地點教佢地使錢,用一句粗俗既說話講,自己春袋自己揸,有幾用力自己知。每個人情況唔同,還學債,畀家用,住得遠,行頭淡,每個人都有自己困難,將自己果套套落去人哋到,叫武斷,同時係非常唔尊重別人既做法,更加係自高自大。

攞番上一代點窮點折墮來講係無意思,因為你條線點定都得:你話你當年餐餐食腐乳?當時大陸個個食緊樹皮!你食腐乳真係身在福中不知福,使錢使得真係奢侈!咁樣有意思咩?事實係每一代都有新事物新準則,根據呢班人所講人類文明係唔會進步的,因為你用新產品就係奢侈了,返去點油燈吧啦。

但你同呢班人講有咩意思?成班香港人只係斟酌住「個數呢到唔準果到唔準」「你過兩年都搵唔到十萬九千七你就真係廢啦」,首先個數係指一個概括,用既就係今時今日既標準,其次而家就係話過多幾年都無上流機會丫嘛,因為你哋放任個社會越來越不公義丫嘛,根據「過兩年就要人工大升」既理論,點解你唔係李嘉誠?咁你係咪廢柴?

不久之前有幾個經濟學者喺報紙寫文,推介一本講述窮國窮人心態既經濟書。同香港既經濟學者唔同,呢本書既作者研究咗好多睇落好難解既現象,例如點解窮人寧願即時折現使咗筆錢都唔儲?書中既結論好有意思,因為窮人無論點儲,都無可能儲到去咩偉大既目標,現時使咗筆錢去,係最理性既選擇。喺香港,你永遠只會聽到人推搪話「後生仔不知所謂」,連諗下原因都懶。

再者,人工升咗又點?錢又係去返「進修」到,進修完你學歷高過你果個只得中五學歷既老細又點?當年有話逐年逐年續約咩?當年做電訊,做巴士公司,做教師,做社工,有逐年合約咩?有一個位拆三個位之後做兩年就無津貼叫你收皮咩?唔好講政府工喇,就算做電訊,做英資洋行,一樣有長俸呢回事?而呢班人而家做緊乜?佢地連政府喺13年前已經取消咗長俸都唔知!脫節到呢個地步,究竟呢班人知唔知而家個社會咩事?知唔知咩叫TA?知唔知咩叫一筆過撥款?就連做巴士公司,新入職既一批,待遇同福利都差過舊一批好多,炒亦係炒佢哋先。

而進修,當年就算做督察,你都可以無乜學歷去做,就算曾蔭權,一個連大學學位都無既人一樣可以去做政務官。今時今日?連做個文員都要你碩士,仲要畀人贈多句話你讀死書。讀得多就讀死書讀得少就無技術,呢種唔係兩頭蛇又係乜嘢?而校外進修,今日既碩士價錢係比起十年前貴超過一倍,人工就原地踏步無升過,咁樣仲唔叫負擔大咗?

世界上既問題有好多種,好似擇偶咁,一個人如果決定單身,係無問題,有問題既係單身又話唔希罕轉頭又叫春,放喺理財就係明明無錢又大使又想發達,呢類人有無?一定有,多唔多?唔多。而即使呢類人再多,都改變唔到而家社會係少咗向上流既機會呢一個事實,顧左右而言他咁話因為有呢類無錢又叫春既人所以社會係有向上流動力?你覺唔覺得前言不對後語?你哋當年

1. 進修平
2. 利率高,定期都十厘八厘
3. 人工升得快,職位升得高
4. 職業穩定

上咗位之後講風涼話,呢D行為,叫無恥。

正如我好多時講嘢其實都辣慶好多人,例如講港女,講有錢人,講學術界,好多人都話我係唔包容,不留情面,係呀,我可能係,但一直都無人可以解釋到畀我聽,個社會係對我哋呢一代有乜嘢咁包容。你唔包容我,仲要屈我,憑咩要我去包容你?環觀整個地球,只有香港呢個地方,呢班上咗位既1960代,1970代,係咁中意詆譭、誹謗新生一代既,只會用佢哋果套狹獈既眼光去評斷人,並且以此為樂為榮。

以直報怨,我只係講我認為公道既說話。

我確實未到「不患人之不己知」的境界,有些說話,不吐不快。

延伸閱讀:

「月光族」湧現或因入息少 價值觀早變「豪花」非壞事 – 信報財經新聞

廣告

About 林非 - Astrophel Lim

離經誌
本篇發表於 博物志 - 雜事漫談, 易 經 - 時事評論。將永久鏈結加入書籤。

17 Responses to 「不患人之不己知」的境界

  1. hippogloria 說道:

    上一代既人根本唔明依家社會狀況,就亂話人~

  2. 80後 說道:

    弱者當被6,70後教訓就識得呻~
    強者已經在思考如何超越他們了。

  3. ABCDEFG 說道:

    真正的強者不在思考如何超越甚麼人,而在於怎樣創造自己的世界,只思考如何超越甚麼人,與可悲的鄰近地區沒有分別,或者更可悲。

  4. 貓大 說道:

    咁長輩們都係大你地30,40年,無人講到要食樹皮食腐乳咁極端,亦唔係咁表面,過來人分享自己經歷,都係希望下一代有得著,希望佢地節儉啲唔好咁大洗。以前啲野係平啲,不過以前幣值無咁高wor, 當時百萬富翁已經很勁,我認為唔應該一面倒話長輩唔應該講,甚至講佢地講風涼話。每個時代年青人都有佢地困難之處,虛心受教,從中學認為自己係啱嘅地方。一面倒太偏激了。

    • 忘了貼出處:https://www.facebook.com/photo.php?fbid=593786063995353&set=a.141543665886264.18956.139543009419663&type=1&comment_id=100856445&offset=150&total_comments=349

    • 另外,上一代人就是不懂得時代有變遷,以往沒有智能電話這回事,現在手提電話是基本配備。對當今情況沒有認識,卻不停「懷緬過去」,自然以為生活很容易,但實際上提出的東西是完全不切實際。

    • 他們就是缺乏基礎認識便胡亂批評,所以永遠以為後生一輩「亂使錢」,等如他們以為開電腦=打遊戲機,完全是僵化刻板的誤解,偏偏自居經驗豐富,死不悔改。

  5. CKP 說道:

    九十後的許多開消,對於「高薪厚職」的我而言,仍然是奢侈品。價值觀是否被歪曲了?(更新了/進步了?)而我不知道為何一年一次旅行和兩年一部手機在開支估算之列。

    • 「然而,新一代人沒有三餐不繼的問題,對生活的追求自然會非常不同,「新一輩經常去旅行,覺得旅行很正常,但我們以前很少會旅行的,這個就是分別。」

      ====================================

      而現在很多學生也要還學債,每月平均還2,000 – 3,000 ,這個表也沒列出來。

      另外200衣履一樣不可能足夠,不是名牌,單是上班服飾已不夠,被人指「不企理」。

      又,現在一個碩士學位要十萬,十年前只需五萬。等如每月3,000-4,000。

      而我不知道為何這些都沒有在開支估算之列,這樣也認為年輕人很易過,價值觀扭曲得非常醜陋。

  6. C 說道:

    「當年有話逐年逐年續約咩?當年做電訊,做巴士公司,做教師,做社工,有逐年合約咩?有一個位拆三個位之後做兩年就無津貼叫你收皮咩?」

    以前合約都冇,年尾請食無情雞是常事添!找份工又要人事又要擔保又要行賄,你估好易?

    批評前唔該睇多o的歷史先。

    • 以往經濟增長快,首先找工作已容易。

      其次,只要看看幾個比較便很清楚:

      政府工:學歷要求低,有長俸,多假期,多福利,教育津貼,房屋宿舍,等等等等。2000年後入職的,全部煙消雲散甚麼也沒有。
      大學教授:以往全是終身教席,現在全部變成「訪問學人」,逐年計約。
      中學教師:文中已說了,不贅。
      電訊:大東電報局,與政府看齊。
      英資洋行:每五年年資就增加一次公積金供款,退休金形式等同長俸。

      誰不看歷史?

      • C 說道:

        謝謝回覆。你說的就業問題在其他地方(美加、日本、大陸)也存在多年。況且,能在以上機構(政府、學校、洋行、大東電報局)工作的人十中無一。

        你這文正在香港電台被讀出! 🙂

      • 謝謝告知。誰在讀?

  7. C 說道:

    是星期五(七月十二日)晚、香港電台第一台的「自由風自由 PHONE」、【博客自講︰月光族】製作︰高福慧。
    http://programme.rthk.hk/channel/radio/programme.php?name=radio1/openline_openview&d=2013-07-12&p=1069&e=224954&m=episode

    如用RealPlayer,是第二個clip,07:53開始。

    另期待你續寫「那年,1974」!

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s