港女、洋腸、蘭桂坊

DSC_8493 - 1

老實講我唔係太明白點解咁多人對「港女、洋腸、蘭桂坊」一事咁上頭,以至搞到要起底,批鬥,不一而足。

事源係一段 youtube 片,片入面係個港女一面攬住個鬼佬,另一手就拖住個疑似港仔,個港仔又好似好窩囊咁無晒符。呢段片一出之後可謂激起「義憤」,短短幾日就將片中所有人──包括拍片者──起晒底,然後大發議論,甚至認為係喪權辱國,被人歧視,一副義憤填嘅勢態。本來最直觀嘅反應係認為呢個萬惡嘅港女侮辱咗港男嘅尊嚴,到後來據稱果個「港男」原來係新加坡男,就更大鑊,上升到整個「華裔」男嘅尊嚴問題,另外唔少得嘅當然係批判港女有幾賤幾崇洋,鬼佬就點樣玩弄女性之類啦。

其實整件事我真係無辦法有咁多感覺,有咁多意見。喂,出得黎老蘭玩,都唔係抱住相睇嘅心態掛?都係男男女女,燈紅酒綠,醉眼昏花之下求其揀件啱 feel 嘅就去馬嫁啦下話?唔係擇偶喎而家,係擇撚/ 擇閪喎,成個環境根本就係大家只係求個開心,咁你情我願嘅時候,揀咩仔,只係口味問題。而事實上除咗老蘭之外要食鬼仔嘅機會又唔係多,有食唔食罪大惡極呀。等如所謂人一世物一世,鬼妹點都要砌一砌,老蘭同一晚、每一晚,亦不知同時上演緊幾多港仔溝鬼妹嘅戲碼啦。當然,我都認為港仔溝鬼妹嘅數字應該比較低,語言係一個問題,身型外貌確實亦係另一個問題,人家的確係無咁中意「異國風情」咁。好多鬼仔/ 佬都會去做下 Gym ,身型確係遠比港仔大隻。有啲港仔群得鬼多,都會健下身,身型都睇得吓。喺老蘭呢個環境下,你副「偈」係最重要,睇落合眼緣就食得,背後咩文化,咩溝通,咩伴侶,通通放埋一邊。可以一齊企返一晚,就夠啦。而家個港女係去揀老公咩?又唔係好覺佢哋係噃。

當然,如果我身邊有朋友係好似片中嘅港女咁,朋友之間唔認同佢價值觀而圍內講佢是非,係好正常嘅事,無論用幾咁冠冕堂皇嘅語辭都不能否定呢個係人性來。但係而家個港女同你每.一.個有親咩?對我黎講根本佢就咩人都唔係,佢係淫娃定紅 Van,崇洋定崇日,其實真係唔關我事,又唔係我同佢過人世,我又使乜知佢咁多嘢?頂多係佢男友或老公(如有)或未來男友或老公要知啫。到時佢要承受嘅壓力應該係來自佢另一半,而唔係塘邊其他人喎。每晚老蘭都不停上演呢類男男女女嘅尋歡之事嫁啦,係呀,係好肉欲橫流,好惡俗,好淫穢呀,社會總係有唔同方面嫁啦,呢單嘢又唔係犯法,其實有咩好討論呢。你討論話個港女放蕩,或者好可能係嘅,但咁又點呢其實。你話佢係立咗個貞節牌坊就話啫。

喺呢個「人人都可以成名十五分鐘」嘅年代,每一個人都搞到好似公眾人物咁,只要有人對你「有興趣」,「幫你上位」,你就會無啦啦成為公眾人物。我認為個人嘅道德標準同社會嘅道德標準係唔同的,個人嘅道德期望同一佪公眾人物嘅道德期望亦係唔同的。即如一個普通人挖鼻同特首挖鼻都已經兩回事,普通人離婚同政治人物離婚又係兩回事。一個人閂埋房門鬧老細係仆街,同佢走入老細間房指住佢鬧仆街,更加係兩回事。問題係而家互聯網年代,你可以毫無理由之下無啦啦變成公眾人物,接受「最高道德標準」嘅試煉。就好似有人將你閂埋房門鬧老細仆街拍成片再傳晒畀全公司一樣,大家係唔會識得分咩叫私人咩叫公眾,喺果一刻,一樣明明私人嘅事都會變成好似原本就係公眾一樣,大家就用咗公眾人物嘅道德標準去衡量件事。

實際上我又唔覺得真正擇偶時港男真係會輸蝕畀鬼仔/ 日本仔/ 大陸仔喎。你去老蘭講擇偶,基本上同入聖堂講叫雞係差唔多,都係「資源錯配」。老蘭互溝你合一晚眼緣就夠,可能第二朝起身你會奇怪點解琴晚會中意呢件咁核突嘅物體。擇偶要考慮多好多實際問題,性格啦,階層啦,學識啦,觀念啦,港男港女都係同一個環境出來,其實係最合工尺。呢一點我真係覺得港男港女沒有誰比誰高尚。實際擇偶係複雜好多,多好多因素要考慮,亦無定法,有啲人窮一生之力溝鬼仔/ 鬼妹,即使差異好大但亦有人修成正果有人失敗收場,最緊要你知道自己想要乜嘅啫。真係中意鬼仔/ 鬼妹,有錯咩?無。

不過都係果句,老蘭企足一晚呢類事情,風險其實好高,我就點都唔明同一個陌生人有咩好扑,無情感基礎嘅扑嘢同拍咸片應該無乜分別。再者仲有傳播性病嘅風險,我唔明點解仲有啲人咁熱中呢回事。假如我真心為個朋友好,或者有朝一日我要教女,我一定會清楚話佢知個危險。咁空虛就搵啲興趣嗜好啦,係咪?最搞笑嘅係有啲人因為空虛寂寞而落老蘭,但落得多老蘭又不停鳩叫話「無晒好男/ 女人」,屌,去老蘭尋真愛,等如去雞竇搵處女,傻的嗎?

廣告

About 林非 - Astrophel Lim

離經誌
本篇發表於 起居注 - 生活隨話, 博物志 - 雜事漫談。將永久鏈結加入書籤。

2 Responses to 港女、洋腸、蘭桂坊

  1. 引用通告: 港女、洋腸、蘭桂坊 - dropBlog

  2. 引用通告: 港女、洋腸、蘭桂坊 | PHP News

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s