《我係香港人》

Mao's Kitchen cartoon by Jingxiong Guo2我真係估唔到,到今日仲會講「文化中國人」呢個話題。

老實講,身為一個讀中文嘅人(中文系畢業,雙主修中文同翻譯),加上係一個玩中樂嘅人,每當睇到呢啲「我係文化意義上嘅中國人!我唔認同中共!但我係中國人!」嘅講法,覺得好笑之餘,更加係搖頭嘆息。

首先,咩叫「文化意義上嘅中國人」?食唐餐?用筷子?寫漢字?講中文(泛指中國大陸範圍內各地語言)?讀中史?

咁美國都係講英文,佢哋又係咪「文化意義上」嘅英國人?德國柏林「大皇宮」好多工藝品係由法國運過去,甚至模彷法國工匠,咁德國人又係咪「文化意義上」嘅法國人?幾乎成個南美(係喇係喇除咗巴西嘛)都講西班牙話,佢哋係咪「文化意義上」嘅西班牙人?甚至南美探戈都係脫胎自西班牙佛朗明高(Flamenco),咁南美係咪又一次變咗「文化意義上」嘅西班牙人?拉近啲,日本傳承同保留晒隋唐文化,咁日本人係咪「文化意義上」嘅中國人呀?

「文化意義上嘅乜乜人」呢個概念非常奇怪,其實係混淆咗兩個概念:國族認同與文化認同(術語get!)。文化認同係可以好混雜、好廣攝嘅,講真,而家啲小朋友聽韓語歌長大,佢哋可能對韓國嘅文化認同好高,好似我哋(八十後呀!)當年長大好多女仔好中意日本文化,將自己打扮到半個日本妹咁,呢啲我理解為文化認同。而國族認同係更加與你出生成長嘅「地方」、「社會」有關係嘅。舉例,如果你生於美長於美,就算你父母係黃種亞裔人士,你仍然可以係國族認同上認為自己係美國人嘅。而普遍世界上,「你係乜乜人」係指國族認同下嘅「乜乜人」,而唔係咩「文化意義上」嘅「乜乜人」,因為文化認同嘅定義係鬆散,而且可變得多嘅。國族認同之中,尤其以你出生地,或者你喺某地居住咗幾耐,為一個相當重要嘅指標。舉例,就算你唔係出生喺加拿大,但你中學開始過去讀書、畢業、做嘢、結婚,咁你國族認同係「加拿大人」係好合理。

源乎此,各國嘅國籍法,移民法,都會參考上述有關「國族認同」嘅指標去發護照。而護照就係其中一個最簡單去界定「你係乜乜人」嘅方法。

所以,大談「我係某某意義上嘅乜乜人」其實係好危險嘅講法,表面睇好似好精準,實際上係用一種「僻義」去混淆一種「通用義」。我係文化意義上嘅中國人,但係我又係飲食意義上嘅日本人,我係居住意義嘅東京人,旅行意義嘅歐洲人,咁?

再睇返,高呼自己係「文化意義上嘅中國人」嘅人,有幾「文化意義」?你係會寫書法?識中樂?聽重三六,聽乙反調,而唔係聽「Oppa 江南」?你係咪識分四聲?按詞譜填詞?同朋友出街唔係去唱K係行酒令?好你話你係寫正體字所以係「文化意義上」嘅「中國人」。但,而家「中國」係用正體字咩?香港同台灣先係用正體字喎!咁你個中國係講緊乜?「文化中國」係乜?漢歟?唐歟?明歟?清歟?先唔講清朝根本係殖民主義(即係國已亡呀巴打),你話你係漢人唐人明人?咁法國人可否宣稱自己係「太陽王朝人」?英國人可否話自己係「都鐸王朝人」?墨西哥人可否宣稱自己係「阿茲特克人」?

呢個概念奇怪嘅地方就在於此。你係無論點避,都避唔開與「今日中國」嘅關係。何謂「今日中國」?就係 1949年開始統治中國大陸嘅「中華人民共和國」之嘛。

好,咁你話你只係「文化意義」上嘅中國人,咁你邊忽中國?你出生喺香港,成長喺英殖香港,甚至你父執輩可能都係香港人。而就算你父執輩唔係香港人,係大陸「大逃港」黎香港,咁講到尾你都係香港出世香港長大掛?而你出生,成長嘅年代(又係講緊八十後為例),係英殖管治(1841 – 1997)嘅,成個香港嘅發展、成長、社會制度、價值,有邊一忽係「中華人民共和國」賦予嘅?你同「中華人民共和國」嘅文化、實際關連,究竟喺邊?

文化上,你首先又未必真係繼承到道統,加上世界上真係無乜人自稱係古人,此路不通。國族意義上,香港嘅發展成長又同「中華人民共和國」無關,咁你邊忽「中國人」?只因中國喺 1997拎咗香港?平心而論,如果中國拎咗香港之後好好管治,着力於消除差異,令大陸同香港可以真正契合(唔係夾硬融合啊大哥),或者都仲有一線生機,令人慢慢產生認同。但你睇下今日香港?有邊樣好嘢係大陸帶黎?你講吖,有咩?梁振英?

我就清清楚楚:我係香港人。出世時係,而家係,將來都係。呢個係我嘅族群認同,清楚唔拖拉,唔會「我係文化意義上嘅中國人,旅行意義上嘅歐盟成員,飲食意義上嘅日本人」咁重疊咁含混,因為文化喜好同文化影響,係與「國族認同」互不干涉嘅。

咁你要認係某國某地嘅人,你都要有根據,好似上述所講,你出生,生活嘅地方令你有歸屬感,認同感,你就會產生「國族認同」,唔係話你隨便中意認就認嫁。即如我就算幾中意京香都好,我都無咩理據去話自己係「日本人」嫁,傻的嗎?所以黃安要認自己係中國人,請便,你有大陸身份證的嘛係咪?但羅志祥你拎咩護照?你喺邊度出世長大?你邊一忽「中國人」?

另一方面,可能有人會擺一面諗樣然後擠出一句:咁九七後出世嘅係咪中國人?係!佢哋喺法理意義上的確係中國人,問題係香港原有嘅價值、制度、風氣未被完全同化之前,佢哋仍然殘留著「香港」嘅基因喺到啊。你問下十八歲以下嘅後生仔,佢哋係咪「中國人」?想唔想「分享做中國人的榮耀」?想唔想唔使用護照唔使用回鄉證就返大陸?經泰國瞬間轉移返大陸?想唔想?你有無問過年輕嘅「香港村」村民?村民究竟點諗?你唔去解放佢哋,唔去幫佢哋建設、尋求一個更自由嘅世界,而強加一個無歷史無脈絡嘅身份喺佢哋身上,公道咩?公平咩?

最後,你要繼承「文化中國」,都麻煩睇吓自己,反省吓自己嘅學力、品味。你分好四聲,寫好字,品味下咩叫按譜填詞,學吓對仗平仄格律,聽中樂,學中樂,去茶館,先好話自己係「文化中國」嘅繼承者啦。

廣告

About 林非 - Astrophel Lim

離經誌
本篇發表於 起居注 - 生活隨話, 易 經 - 時事評論。將永久鏈結加入書籤。

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s